政情：「似顏繪」諷時弊勁生鬼
近年喺香港興起嘅諷刺時弊政治畫作，令生活喺夕陽政府惡劣管治下嘅市民，睇完畫作後都可以發出無奈嘅微笑。呢類畫家除咗近期最出位嘅Cuson外，另一位出色畫家Simon Leung亦已經靜靜起革命，以外國流行嘅「似顏繪」風格殺入香港政圈。
來稿自薦 分享畫作
Simon係睇到本報政情版嘅「Check In站」宣傳後，主動來稿推薦其「似顏繪」畫作。佢話自己一向喜歡繪畫，但一直只係公餘時間兼職畫吓，賺賺外快。不過，由於畫作實在太出色，加上光顧嘅客人愈來愈多，Simon近期已經正式轉做全職畫家。
Simon嘅畫作叫「似顏繪」，特色係將繪畫對象嘅特徵放大同誇張化，佢話呢種作品依家喺日本好流行，總之睇到幅作品你就一定知道係邊個。原來Simon有多幅畫作係諷刺近期國家領導人訪港期間嘅保安安排，主角包括警務處處長曾偉雄及港大校長徐立之，佢哋嘅特徵相當誇張，唔知大家睇完會否舒暢啲呢？