政情：唐唐民望低處未算低

中大亞太研究所尋日公布最新一輪民調，唐唐評分只有四十四點一分，較七月份大幅下跌二點二分，為上任以來新低，相信係同佢嘅「垃圾論」兼死不認錯有關。佢嘅上司煲呔曾都唔好得去邊，評分只有四十六點五分，亦較七月份跌零點五分，而市民對高官問責制整體實踐嘅評分，亦再跌零點二分至四十二點三分，反映成個夕陽政府都不得民心。

一班庸官之所以民望低，除咗係自作孽之外，亦可能關乎佢哋流年運程。我哋近年都有邀請香港術數家協會術數師楊子東為一眾庸官批算流年運程，單睇高官嘅年、月、日三柱已相當準繩，包括批中煲呔曾喺牛年農曆九月出事，結果爆出慳電膽消費券涉嫌益親家醜聞，去年虎年又批中發展局局長林鄭月娥及保安局局長李少光黑氣纏身。

至於今年兔年又貼中財爺鬍鬚曾容易出錯，以及唐唐、政制及內地事務局局長林瑞麟（林D9）同林鄭月娥運程反覆，其中唐唐兔年行「七煞」運，「運程出現兩個極端，農曆二月有一番傑作，但七月會有大衝擊，忙中略有枝節，有小人及大是非發生，九月更吃力不討好。」果然唐唐喺農曆七月因為一句「完全係垃圾（completely rubbish）」搞到周身蟻，人人喊打。

究竟唐唐嚟緊嘅運勢又點呢？楊師傅話，正如佢年初批算，除咗農曆九月吃力不討好，呢個八月都一樣衰。至於有冇得化解，楊師傅話唐唐喺八月嘅運勢係「食神祭煞」，即係唐唐會用花巧嘢去解決事件，萬一用口講唔掂就會用手下去壓制困局。回看前晚林D9出席替補機制諮詢會期間所使出嘅苦肉計，莫非就係師傅所講嘅「食神祭煞」？

CY沖煞 徒勞無功

唐唐行衰運，另一疑似特首候選人梁振英（CY）都唔好沾沾自喜，因為楊師傅話CY嘅運程亦唔係好過唐唐好多，事關佢忌金、土，農曆九月屬土，CY沖到正，做乜都只會「徒勞無功」，到十一月就更加洩氣。今次係咪講得中，睇埋呢兩至三個月就自有分曉。