中環出更：吳文華搬竇攬實智慧圓桌
添馬艦立法會新大樓已經萬事俱備，立法會秘書處尋日開始陸續搬竇，直至十九號為止。秘書長吳文華（Pauline）身先士卒，成為首批進駐新大樓嘅秘書處職員，Pauline要離開工作咗十七年嘅舊大樓，感觸良多，好唔捨得大樓內嘅一事一物，除咗大樓帶唔到走外，其他傢俬雜物都搬過新大樓，當中包括佢譽為「智慧的圓桌」嘅圓枱。
卓妮尋日都有去舊大樓見證秘書處搬遷呢個歷史時刻，見Pauline懷住既不捨又興奮嘅心情執拾細軟，佢最關心就係張大圓枱，事關張圓枱早喺八五年之前已經存在，佢有好多棘手難題都係喺呢張圓枱上解決。
難捨百年房門
但要數最唔捨得嘅，莫過於辦公室嘅兩扇房門，門框嘅設計同手工令人讚嘆外，其中一扇門已有逾一百年歷史，但至今依然歷久常新。
尋日下晝搬到新大樓後，Pauline執番好啲嘢，準備喺下周一正式喺新大樓返工。Pauline希望新大樓可以令同事覺得有家嘅感覺，同時令市民感受到立法會可以代佢哋發聲，所以立法會兩大示威區嘅設計，都務必令高官可以聽到或睇到示威者嘅訴求。
卓妮就覺得，單係呢一點政府就要好好學習喇！
卓妮