【本報訊】「志雲大師」贏官司的新聞出街後，本港多個網上討論區均見大批網民熱烈討論、議論紛紛，網友最聚焦的關注點之一，是志雲會否「復辟」及無綫內部會否因此變天，笑指「跟住嚟嗰啲先叫好戲呀」。另亦有不少網友炮轟廉政公署「雷聲大、雨點小」、「無鬼用」。
網民「hwwong」指「陳總肯定來一個大變天啊……」；「（小朋友）」就稱「之前唔幫志雲班人依家腳仔軟鳥（了）」；「paulchen」則笑言「大C（大師）又可以返回6嬸身邊，620（樂易玲）有排震」；「河蟹」更指無綫可「將成件案古仔拍番套劇，搵大師做番主角」。
不過網民「火速上市」指陳志雲「就算脫罪，但佢嘅聲譽無曬（晒）」；「ivan6828」就指事件「再一次證明法律只係保障一部分人」；又有網民指「法律面前，窮人含X，法官面前，富人贏梗」；而「133331628」就認為「法律公正，恭喜陳志雲洗脫污名」；另有人讚王喜對陳志雲「有情有義」。
至於廉署又輸大案，亦成網民「箭靶」，其中「belebala100」直斥「ICAC無鬼用」；「fearless999」更揶揄廉署「入唔入罪唔緊要，最緊要係拉人時上頭條，作大個勢」；「Joeycky」更提及多年前的「舞影行動」，指「ICAC次次告唔入，仲要浪費公帑，社會幾廉潔都洗（使）光納稅人的錢」。