政情：葉劉談白海豚貽笑大方
機場係咪應該興建第三條跑道惹來好多爭議，部分市民擔心將來飛機升降會造成好大噪音，而環保團體就擔心會令喺有關海域棲息嘅中華白海豚受影響。不過，新民黨立法會議員葉劉淑儀（圖）同黨友譚榮邦尋日就力挺項目，佢哋提出嘅解決噪音建議騎呢到爆，提到中華白海豚就更係亂講一通，兩個前高官真係老貓燒鬚。
葉太話，新民黨支持興建第三條跑道，最受市民關注嘅噪音問題，話只要馬灣同青龍頭一帶嘅居民喺屋企安裝雙層隔音玻璃就迎刃而解喎。不過咁喎，即使真係有雙層隔音玻璃，居民都要長期閂窗先有用，閂窗自然要開大冷氣，電費都幾襟計。同葉太一齊見記者嘅黨員李摩西就建議政府補貼埋電費添！建議令在場記者隨即Ｏ晒嘴。
至於環保團體關心興建跑道會影響中華白海豚，葉太回應話，自己唔係動物學家，但相信以海豚咁醒目，佢哋應該識得自己游走，同場嘅新民黨執委譚榮邦亦加把口，話自己細個都冇見過中華白海豚，相信海豚都係由第二處游過去機場喎。一個係前保安局局長、一個係前郵政署署長，估唔到可以講出咁有智慧嘅言論。