政情：張永霖力撐馮國經做特首
前亞視執行主席張永霖（Linus）近日靜極思動，宣布再開咪主持電台節目，佢坦言對好多人和事都「睇唔過眼」、「未能釋懷」，包括不滿煲呔曾施政。Linus又點評多位疑似特首候選人，期間寸爆發表「垃圾論」嘅政務司司長唐英年（唐唐），但就獨讚利豐集團主席馮國經係極之適合做特首嘅人選。
Linus尋日除咗預告復出主持電台節目《張永霖的世界》外，仲逐一點評多位疑似特首候選人，佢笑言同多位疑似特首候選人喺不同場合碰過面，但只係對馮國經作高度讚揚：「佢係一位極之適合做特首嘅人，不過，我相信佢唔會出嚟參選。」問Linus係咪對馮國經情有獨鍾，佢先至補口話上述個個人選都適合做特首喎！
眾多疑似特首候選人之中，Linus對唐唐印象最深刻，但唔係讚美嗰種。佢記得九七回歸後，有次曾應唐唐邀請到淺水灣食日本餐，同枱約有四十人，回程時遇上冧山泥，差啲返唔到屋企。Linus寸爆話：「邊有人請客請到去淺水灣？嗰晚有九成客人都返唔到屋企，請客請到咁，都算特別囉！」