中環出更：羅寶文響應保良「善」用6000蚊
政府派發六千元開始有得登記領取，愈來愈多慈善機構睇中呢個機會，呼籲市民將呢筆意外之財捐出。尋日保良局一眾董事局成員齊齊現身勸捐，富豪集團太子女羅寶文亦現身力撐。中途突然加插一段溫馨片段，推出一個靚靚生日蛋糕，原來尋日係寶文嘅生日，氹到壽星女笑逐顏開。
生日獲驚喜
寶文話，佢事前唔知情，覺得既驚喜又尷尬，事關現場有好多長者及保良局受益機構代表，唔好意思突然變成主角。佢吹蠟燭、切蛋糕，生日願望係祝大家身體健康，最緊要記得將六千元捐畀保良局喎。寶文咁識做，難怪保良局一眾名人善長咁錫佢啦！
保良局主席龐盧淑燕話，呢個活動目的係想向市民發出正確訊息，即係六千元要用得有意義，有能力嘅人可以捐出部分或全部去幫助有需要嘅人。副主席鄭錦鐘（Eric）及總理陳正欣都話，會叫屋企人捐出六千元，自己仲會捐多啲添！Eric話，相信好多唔等錢使嘅市民嫌麻煩唔去領取，佢呼籲大家一定要攞，再捐出嚟做善事，令到社會財富重新合理分配。
前主席劉陳小寶（Angel）、總理陳細潔呢對姊妹花都喺度，兩人經常孖住做善事，難怪愈忙愈靚。不過，Angel就自爆經常被問：「帶個女嚟做善事呀？」原來誤認妹妹係佢個女，真係唔知好嬲定好笑。
卓妮