大學生蝸居劏房 住屋難人人徬徨

若然你係大學生，更加有一件事必須準備妥當，就係解決住宿問題。你知啦，全港七間大學分布不同位置，萬一你入讀位於沙田嘅中文大學而老家又喺港島鴨脷洲，每日山長水遠返學放學肯定將你折磨到不似人形。所以咯喎，大學生好多時候有必要申請入住宿舍。

之但係非常之咁頭痛，七間大學嘅宿位同樣供不應求。好似科技大學咁吖，原來只能夠滿足七成申請宿位嘅同學，其餘三成要自己諗辦法解決。點樣解決呢？冇理由走去瞓天橋底啩。

你都咪話香港人嘅生意頭腦唔靈活，眼見大學一宿難求，鄰近科大嘅村屋業主諗出一條招財妙計，就係將自己名下嘅村屋搖身一變，變成十字豆腐嘅劏房，租畀無處容身嘅學生哥。本報記者巡視過o架喇，大埔仔村由於距離科大僅僅五分鐘步行途程，所以成為大學生租住嘅熱門勝地。大埔仔村有人將七百呎單位一劏就劏出四個板間房，每房租金大約三千至三千三百元。地產代理仲話，盤源珍貴，要租快手。

至於中大，每名學生只有其中一個學年獲得保證分配宿位，其餘學年都有可能食自己。所以咯喎，中大學生往往被迫蝸居於附近嘅村屋。當然啦，蝸居之處少不免又係劏房，而劏房嘅意思係經過大手改裝，難免會出現潛在危機，例如石屎剝落扑穿頭，或者喉管爆裂跣到一仆一碌。如果你問，萬一火警會唔會逃生無門o架？功夫茶真係答你唔到，淨係可以求神拜佛祝願大學生，千祈唔好淪為土瓜灣馬頭圍道唐樓劏房大火嘅翻版受害者。

唉，大學生都要蝸居劏房，你話香港嘅住屋問題係咪好鬼死嚴峻？一般嚟講，劏房係港產貧民窟，堂堂大學生入住貧民窟係咪有辱斯文？

計功夫茶話齋，特區政府真係有責任好好解決人人徬徨嘅住屋問題，不單要興建公屋甚至居屋，同時要撥地畀大學興建宿舍。喂，大學生苦無立錐之地好慘o架，唔通又要逼到佢哋示威抗議咩？示威抗議都算嘞，一個唔覺意香港公安局又接管校園實施變相戒嚴令，神秘黑衣人將示威學生踢出所謂核心保安區，甚至乎又玩非法禁錮，事後再交由禿鷹一哥發表一連串謬論死雞撐飯蓋，咁就眼冤啦！