政情：施政報告淪地區議題？
身兼九龍城區議員嘅專業會議立法會議員梁美芬（鼠王芬），曾被嘲諷將地區議題帶入立法會，但原來佢嘅疑似區議會選舉對手都有樣學樣。
傳聞積極考慮參選黃埔東選區挑戰鼠王芬嘅民主黨黃碧雲，尋日以學者身份去政府總部向煲呔曾反映施政報告建議時，就帶埋道具去反映渡輪服務呢個地區議題，喺一眾學者之中都算夠晒突出。
黃碧雲尋日帶咗一幅足足有半個人咁高嘅紙板到諮詢會，上面畫有一艘船，船上寫上「要求恢復港內渡輪服務」。佢話因為無咗紅磡至中環及灣仔兩條渡輪航線後，對居民十分不便，反正煲呔曾餘下任期都唔長，所以做到嘅嘢唔多，不如先搞掂為渡輪重新招標，咁咪造福市民囉！
區議會選舉臨近，積極考慮參選嘅人士絞盡腦汁爭取支持可以理解，但估唔到煲呔曾嘅施政報告已淪為地區議題，更被人睇死佢做唔到大事，做特首做到咁弱雞，認真可悲。