政情：勞聯兩新貴出戰區選
港九勞工社團聯會（勞聯）成立二十多年，一直予人暮氣沉沉嘅感覺，但原來勞聯一早搵定兩個靚仔靚女做佢哋嘅秘密武器，準備參加十一月深水埗區議會選舉，為勞聯繼續壯大發展打下根基。
現年二十八歲、就讀新聞出身嘅勞聯社區幹事譚金蓮（Jenny），一直對時事十分關注，○八年獲聘為勞聯立法會議員李鳳英助理，○九年開始轉戰地區服務，以新聞觸覺為社區問題把脈，期間最令Jenny印象深刻係處理區內垃圾屋問題。
Jenny話，佢曾就垃圾屋問題與多個政府部門交涉，但各政府部門都只懂互相推卸責任，更加激發Jenny尋根究柢嘅本性，勢要解決困擾區內市民多時嘅問題。
同樣年紀輕輕已擔任勞聯副主席嘅林振昇（昇仔），係勞聯另一個重點培育嘅對象，佢特別關注如何設立全民退休保障嘅問題。昇仔話，自己之前都有留意立法會討論全民退保，見到好多數據分析都好有參考價值，佢希望大家可以開始聚焦分析問題喎！