早前港股開始跟隨外圍大跌時，財爺鬍鬚曾信誓旦旦話本港嘅交易同結算系統運作暢順，點知翌日立即爆出港交所「披露易」網站遭黑客入侵醜聞，之後佢就狡辯話呢啲情況喺其他國家都發生過，企圖卸責。
立法會財經事務委員會今日召開特別會議討論有關事件，包括鬍鬚曾在內嘅特區四大財金巨頭，居然一同缺席會議，大難臨頭各自飛。
鬍鬚曾放長假未能出席會議，理應就由身兼署理財政司司長嘅財經事務及庫務局局長陳家強代為受靶，但佢不但唔出席，就連該局常秘、副秘書長都唔到，僅派一名首席助理秘書長代答。另外相關嘅港交所主席夏佳理同金管局總裁陳德霖亦雙雙缺席，港交所都話派出行政總裁李小加，但金管局一名代表都冇，認真離譜。
今日嘅會議除咗討論黑客入侵醜聞，亦會傾吓國務院副總理李克強訪港時提出嘅多項金融措施。對於呢啲「好嘢」，財庫局就派出副局長梁鳳儀出席，連金管局都有派代表，證明有關高官並非真係唔得閒，只係唔想面對議員批評啫，完全係逃避政治問責、藐視立法機關嘅行為。