政情：隱形卓永興辣慶勞界

勞工界爭取強制復職權多年，政府三年前已提出修訂《僱傭條例》，畀權力勞資審裁處可以毋須得到僱主同意下，幫啲遭受不合理或不合法解僱嘅打工仔，向僱主發出強制復職或再次聘用命令，唔遵從命令僱主就要向被炒打工仔畀多筆最高五萬元嘅額外款項，當時已得到勞顧會同人力事務委員會同意。不過，咁啱去年政府又修訂條例將蓄意違反勞審處判令刑事化，先至搞到復職權修訂一拖再拖。

開會撞正放長假

事隔幾年，勞工界終於等到政府重提修訂建議，上個月再去勞顧會做諮詢，點知勞資雙方嘅委員去到個會，先知身為主席嘅卓永興放大假，由副處長黃國倫以署理處長身份頂上，勞方委員原本以為可以順利通過，點知就畀班資方代表有機可乘，擔心立法影響營商環境，要再諮詢業界咁話。咁搞法又唔知要拖幾耐先至上到立法會，班勞工界唔㷫就奇啦！

有資深勞工界人士講番，勞顧會咁多年來都未試過主席放假期間召開會議，事關處長先係主席，而副處長同其他散仔都唔係委員，所以卓永興都算係破天荒囉。有人仲話，自從卓永興做咗處長後，除咗開頭拜訪過四大工會外，之後就做咗「隱形人」，不但唔應邀出席工會會慶，就連指明要約見處長解決嘅勞資糾紛都唔理，甚至慣常喺勞顧會開會前嘅摸底都懶得做，笑謔話呢個處長咁他條都幾好做。

其實卓永興之前做食環署署長時，已經出咗名同工會關係惡劣，未過檔勞工處前亦有工會表明唔歡迎佢，證明佢人際關係差強人意。勞工處發言人話，處長的確喺七月十八日至廿九日放咗兩個星期大假，雖然勞顧會會議撞正處長放假，但副處長署任無影響會議成效，又話處長上任後都不斷同勞工界交流意見，嚟緊都會繼續做喎。