中環出更：彭太率女童軍寧夏摘杞子
女童軍香港總監彭徐美雲（Josephine）近排多咗個外號叫「鐵娘子」，事關佢喺暑假期間，到訪英國、北京交流，回港抖唔夠兩日，八月中又帶逾百位女童軍北上寧夏考察。
地頭蟲兒子做嚮導
寧夏充滿回族風情，初次到訪嘅Josephine話大開眼界。佢囝囝彭穎生（Victor）係寧夏青聯，熟晒地頭，請纓做媽咪嘅嚮導，暢遊寧夏名勝。
三面環沙嘅寧夏，正努力開拓沙漠旅遊業，團友爭取難得機會遊覽沙坡頭風景區，欣賞沙漠風光，仲齊齊試騎駱駝添。
數最好玩嘅節目，就係摘杞子。寧夏杞子全國聞名，Josephine帶隊到訪紅瑪瑙生態枸杞園摘杞子，雖然當地氣溫高達攝氏四十度，但團友睇見一粒粒色澤艷紅、肉厚甘甜嘅杞子，興奮地盡情採摘。
女童軍又四圍搵食，當地手抓羊肉最著名，肉質嫩、瘦肉多、羶味輕，Josephine入鄉隨俗，用手抓起碟上嘅羊肉，放入以芝麻醬、醋、蒜泥及辣椒油混成嘅醬汁，啖啖滋味，食到唔停得口。
卓妮