食肆亂擴充居民硬啃油煙
「佢一開檔我哋就要閂窗，啲油煙犀利到泊喺一樓停車場啲車都肥晒！」元朗一商場對出常有食肆違法將枱櫈擺放行人路上經營，既影響居民出入，油煙亦更令樓上住客「有氣冇碇抖」！居民李小姐指，有關食肆每日下午五時便開始將枱櫈擺滿商場對出行人路，每至星期六、日情況更為嚴重。
食環署發言人表示，一向關注上址食肆非法擴展營業範圍情況，除日常巡查外亦會不時採取突擊執法行動；過去一年便向有關食肆提出三十七宗檢控，但並未發現食肆有排放大量油煙情況，強調已將情況轉介環保署跟進。
當區區議員袁敏兒指上述問題已持續多年，「呢間執咗，嗰間又開始營運，真係好棘手！」袁指區內附近食肆「扣滿分」便會轉手和轉地點經營，有不少食肆於近年遷入上址，令情況更為惡劣，認為食環署對問題責無旁貸，須加緊巡查，並提高執法力度。