政府成事不足、敗事有餘，好似國家領導人訪港公布助港經濟措施，但警方保安安排一鑊泡。正當放假多時嘅警務處處長曾偉雄今日上立法會解畫之際，本身與事件無關嘅民政事務局局長曾德成就火上加油，尋日喺網誌發表文章叫大家要聚焦喺經濟措施上，而且「切勿受干擾」，否則經濟措施帶來嘅機遇就會白白流失喎。
德成局長話，國家領導人所講嘅各項政策措施係最值得香港聚焦嘅大事，叫大家切勿受干擾而讓機遇白白流失，又若有所指話世事有大道理、小道理，能夠分清大小、輕重、優次係民智成熟嘅標誌。明眼人一睇就知佢暗寸緊各界關注警方動用過分警力係小題大做，民智好唔成熟啦。
老實講，沉寂多時嘅德成局長突然好似塘邊鶴咁說三道四，究竟係為咗爭取下屆政府有得留低吖？抑或想幫發表「垃圾論」嘅政務司司長唐英年同曾偉雄擋箭呢？相信佢自己先知。但好不幸嘅係，佢喺呢個群情洶湧嘅敏感時刻講呢番話，隨時引發另一場政治風波，最終只會愈幫愈忙。