政情：政府淪AO跳槽踏板
每年政務官（AO）有招聘時，都吸引大批大學畢業生爭崩頭申請，嚟緊九月就有新一輪招聘，政府驚死無人申請，專登喺網上賣廣告，仲搵咗兩個約有一年資歷嘅新人講感受，硬銷做AO有幾好。公務員工會聯合會主席梁籌庭就慨嘆，依家AO已非鐵飯碗，有五、六年經驗嘅政務官，都心郁郁想過檔私人公司搵真銀，最終令政府淪為職訓局。
政府今次硬銷AO，搵到兩個後生仔女出鏡，包括喺發展局海港組工作嘅梁家瑋，佢喺英國劍橋大學取得經濟學位，仲有中大畢業嘅運輸及房屋局嘅魏麗盈，兩人都話學到好多寶貴經驗。梁籌庭話，AO入職後會接受唔同部門訓練，有時仲會去外國深造，所以喺私人市場好搶手，結果剩低一班二級人才做官，變相幫大公司培訓人才。
話口未完，財爺鬍鬚曾尋日又喺網誌懶叻話自己有三個年輕大學生做AO實習生，不過咁啱係兩男一女合成個「嬲」字。老實講，鬍鬚曾已經唔醒，仲要扮勁去教人，恐怕只會誤人子弟。