政情：工專聯拉攏哪吒加盟
由自由黨、經濟動力及專業會議組成嘅「工商專業聯盟」（工專聯），早前大鑼大鼓成立，工商界都期望工專聯日後向政府有更高叫價能力，未來亦可拉攏更多政治人才，特別係有地區直選經驗嘅政治人才加盟，以壯大工商界嘅聲音，有傳工專聯其中一個拉攏對象係已退出自由黨嘅專業動力召集人方國珊（哪吒）。
哪吒本身係西貢區議會委任議員，有意參加嚟緊十一月區議會選舉，已係政圈嘅公開秘密。繼早前先後喺港鐵將軍澳站同坑口站設立議員辦事處後，尋日又聯同另一名西貢區議員陳繼偉殺入調景嶺開設第三間議員辦事處。獲邀主禮嘅鄉議局主席劉皇發，就趁機落足嘴頭向哪吒推銷工專聯對香港嘅重要性。
至於會唔會搵哪吒加入，發叔話，哪吒係細姪女，可以搵個機會傾吓，又鼓勵對方搞好本身工作喎。話時話，哪吒早前退出自由黨後，有傳民建聯同經濟動力請佢加盟，今次就傳出工專聯都有意延攬佢，本身係醒目女嘅哪吒根本係皇帝女唔憂嫁，絕對可以善價而沽吊高嚟賣，難怪佢尋日對加入工專聯一事不置可否喇。