政情：工黨瘋狂挖角直搗泛民
打正旗號維護工商同專業功能界別利益嘅工商專業聯盟，喺上星期正式成立。而政治同民生立場上企喺另一個極端嘅香港工黨，最近亦已進入籌備黨章架構同私下招收黨員嘅階段，預計喺區議會選舉後就會開張。除咗早前已曝光嘅職工盟、街工、公民起動同社會工作者總工會（社總）核心成員，據聞工黨亦喺泛民主派圈子內瘋狂挖角，仲要專攻民主黨、公民黨同民協三大政黨，勢必令泛民政治版圖大洗牌。
工黨主要由五名現任及前任立法會議員做核心，包括職工盟李卓人、街工梁耀忠、公民起動何秀蘭、社總張國柱同前公民黨成員張超雄等，不過該等組織同佢哋嘅現有成員，因為種種理由唔會全數加入。其中最多會員嘅職工盟同社總，都唔想混淆工會同政黨嘅角色，只會容許會員以個人身份入黨。
白鴿黨成頭號目標
據聞至今正式答應加入工黨嘅只有數十人，明顯較現有三大泛民政黨少，惟有加緊向外挖角，頭號目標係黨員最多嘅白鴿黨，特別針對嗰啲唔支持政改方案兼有離心嘅黨員，以及曾經代表職工盟出選嘅蔡耀昌，以填補工黨喺新界東嘅真空局面。不過，蔡耀昌早排先正式加入白鴿黨，佢本人又支持政改方案，自然唔會咁快又再轉會。其他白鴿黨員嘅反應暫時亦麻麻，但唔排除區選完結後，有人會歸咎白鴿黨支持政改連累佢哋落選，繼而集體退黨轉碼頭。
公文袋方面，據聞工黨有意游說同樣來自新界東嘅曾國豐（阿豐）過檔。阿豐過往跟開同公文袋高層不咬弦嘅大口湯，發展唔係太順暢，加上佢現時任職嘅國泰工會，正係職工盟屬會之一，自然成為重點挖角目標。阿豐本人就話至今冇人正式搵過佢，但亦唔會講死將來一定唔會轉會喎。
民協方面，黨主席廖成利（老虎仔）睇淡民協前景，有意帶埋一批厭倦前主席馮檢基領導嘅黨友離開，早已係公開嘅秘密。之前傳佢想轉會白鴿黨，但因為好多民協成員都同白鴿黨有過牙齒印而未能成事。工黨喺九龍西同樣係冇人冇物，自然好想拉啲一直專攻九西嘅民協成員加盟。有消息話一旦民協喺嚟緊區選大敗，老虎仔就會名正言順同民協講拜拜，拉大隊過檔工黨喎。