中環耳目：甄韋喬愛太平館乾炒牛河
乾炒牛河，係瘦身者大忌。不過，菁英會秘書長兼利興控股主席甄韋喬（Mickey）天生係「鋼條男」，食極都唔肥，而且最愛係「太平館」招牌乾炒牛河，同埋嗰度嘅招牌瑞士雞翼及巨型梳乎厘，幫襯十多年依然回味無窮。佢話太太同三個囝囝都好捧場，一家五口食得好滋味。
由倒垃圾變清潔王子
Mickey對食從不揀擇，坦言小時候家境貧窮，對美食很珍惜。佢回想當年初中畢業後加入清潔工行列，初次踏進垃圾房，臭得想掉頭走，為清潔龍蛇混雜的重慶大廈也要走進去，全靠一支白花油撐過來。八九年，他成立清潔公司，承包近五萬個公屋單位的清潔合約，贏得「公屋清潔王子」美譽，○七年更獲選香港十大傑出青年。
事業有成嘅Mickey，有日參加領袖課程，醒覺人生不應只顧搵錢，開始勤做義工，今年七月更成立「願景兒童發展基金」，集合逾三百位志同道合嘅義工，不時往內地建校扶貧，又為香港長者義務剪髮，愛心爆棚。
卓妮