中環出更：陳詠梅四攻碩士校園尋青春
香港叻女多，銜頭一籮籮。好似已退休嘅前入境處助理處長陳詠梅（Helen）就不停進修，已經擁有三個碩士銜頭，但佢嚟緊九月又去理工大學攻讀中國文化碩士，進軍第四個碩士銜頭。
鍾志平想捉北極熊？
香港提升快樂指數基金日前搞講座，擔任基金義務總幹事嘅Helen現身主持大局，仲風騷地分享讀書大計。Helen年前剛讀完佛學碩士，加埋電子商貿同資訊科技碩士銜頭，堪稱才女。讀咁多書為乜？Helen話，坐喺課室內聽書，令佢覺得永遠年輕，況且中國文化一向係佢「飛佛」，理大課程涉獵儒、釋、道哲理，恨不得快啲開學。
愛挑戰自己嘅，仲有基金會副主席兼工業總會主席鍾志平（Roy）。剛由東非返港嘅阿Roy，又起程勇闖北極，同行仲有仁愛堂總理及廿多位學生。阿Roy牙擦擦話，去北極要捉隻北極熊，取其熊掌，整番餐「滿漢全席」招呼老友喎。
講番今次講座，請來精神科醫生曾繁光分享「邁向幸福十一小步」，秘訣係學會慈悲、放下及寬恕。曾醫生話，遇上逆境時，要懂得退一步海闊天空：「就好似你睇電視時，唔會將個鼻哄埋電視度，咁樣，反而乜都睇唔到。」
基金會節目多，嚟緊將去深水埗及黃大仙派月餅，九月中將應叙福樓集團執董黃傑龍邀請，帶一百位低收入家庭小朋友去「御苑皇宴」擦餐勁，認真高興。
卓妮