嘩！唔講唔知，原來位於油麻地窩打老道嘅廣華醫院已經有一百年歷史，而且同辛亥革命差一日就同年同月同日生！
辛亥革命係一九一一年十月十日，廣華醫院建成之日就係同年嘅十月九日。巧合得來都幾有意義o架，事關今年係辛亥革命百周年紀念，順便慶祝廣華醫院一世紀生日快樂都好吖。
之不過咁，香港係一個「一百歲唔死都有新聞聽」嘅奇怪地方，同樣係百年老字號嘅香港大學近日都因為警察禁錮學生而搞到風波不絕啦，廣華醫院今年大概都冇乜心情開生日派對。點解咁講呢？原因係特區政府唔知黐咗邊一條筋，遲遲未落實廣華醫院重建大計，呢一座醫療界百年老店有機會淪為危樓。
早於幾年之前，創院機構東華三院已經爭取重建，重建計劃嘅工程規限聲明亦於○八年七月得到食物及衞生局批准，○九年更加同醫院管理局簽訂合作備忘錄。重建廣華醫院嘅工程原訂今年施工，預計二○一七年完工。可惜吖，萬事俱備，只欠東風，政府死拖爛拖硬係唔肯撥款，實際嘅重建時間表仍然遙遙無期。
為咗了解廣華醫院係咪瀕臨風燭殘年危險期，本報記者聯同檢測樓宇結構嘅技術顧問實地視察。香港驗樓及結構診斷公司技術顧問賴達明，利用高清紅外線掃描儀向廣華外牆掃射，得出一幅紅外線圖片，顯示醫院主座大樓有超過十處地方出現「紅色」。圖片見紅係乜嘢意思呢？意思就係話，嚴重石屎剝落。至於「紅得好勁」嘅位置，就係急症室主要通道。根據賴達明嘅講法，整幅外牆最快可能於兩年後塌陷，封阻急症室通道，危及醫護人員同病人嘅安全。
呢嗱嗱嗱，自從土瓜灣馬頭圍道發生唐樓倒塌慘劇之後，香港人對於死人冧樓特別敏感，廣華醫院到底會唔會砰嘭一嘢冧落嚟㗎？
其實咯喎，唔使專業人士出動高清紅外線掃描，記者淨係憑肉眼都可以見到廣華醫院溶溶爛爛。好似二樓復康花園咁吖，地台高低不平，地板呈龜裂狀。復康花園根本冇人肯用，怕就怕復康不成反受傷！
既然廣華醫院變咗高齡一族，政府因乜事幹遲遲唔落實重建？答案睇怕要交畀油尖旺區議會查找查找，該會副主席梁偉權話呀，如果食衞局局長周一嶽冇一個明確交代，不排除發起遊行示威。
唉，好心周局長唔好學似菲律賓特蠢部隊咁廢柴啦，醫院係救人嘅地方，千祈唔好搞到冧樓害人。總而言之一句講晒，盡快重建杏林聖地！