騙徒呃人手法層出不窮，近日又有新招。前日有人自稱代表人民力量出選十一月沙田區議會廣源選區，點知原來係有人招搖撞騙，幸好有支持者迅速報料，等人民力量可以急發嚴正聲明以正視聽，佢哋仲表明，對於一切訛傳或者失實言論，保留一切法律追究權利，仲叫受騙人士盡快報警求助。
事緣前日有人喺地區工作嘅時候，聲稱自己係代表人民力量，仲話會參加區議會選舉，醒目嘅街坊疑竇頓生，走去人民力量嘅地區辦事處查詢，於是就揭發冒認事件。人民力量執委會喺聲明度話，佢哋尚未派任何地區發展者出選廣源選區，所有出選者名單都以人民力量正式公布為準，此外，佢哋唔會要求義工墊支任何地區選舉工程費用。
如果有任何人懷疑被騙而蒙受損失，佢哋建議受影響人士盡快報警求助。其實佢哋對散播謠言者嘅身份已經心中有數，不過佢哋厚道無爆出嚟啫，有關人士好應該懸崖勒馬，否則惹上官非就唔好啦！