政情:葉劉禁黨員「借殼上市」

去年匯賢智庫嘅陳岳鵬做做吓議員,突然被政府挖角去做特首辦特別助理,辭去南區區議員及丟低一班選民,結果佢哋喺補選輸得一敗塗地。之後匯賢智庫變身新民黨,加上區選臨近,據聞主席葉劉淑儀已向各準候選人下令,講明當選區議員後,就算被下屆政府委託做政治助理等要職,都要耍手擰頭拒絕,避免出現翻版陳岳鵬。

有新民黨核心黨員透露,陳岳鵬突然離隊對新民黨好傷,所以喺補選中輸鑊甘。佢哋之後檢討過,發現依家做區議員已經唔同以前,以往係區議員帶領街坊爭取利益,依家街坊覺得議員係為佢哋服務,仲訂下目標要議員完成,所以做做吓突然走咗去,班街坊會覺得畀人欺騙,喺補選多數輸硬。

所以葉太有令,叫班準備出選嘅黨員唔好諗住「借殼上市」,選到之後就好似陳岳鵬咁扶搖直上,講明邊個都要做足四年任期,否則唔使諗做政府委任「筍位」。聽完呢個傳聞,睇怕想做翻版陳岳鵬嘅新民黨員都要死心喇。

Money18免費即秒股票報價網站現推出8升級功能,財經資訊,實時實發!