政情：社民連狙擊施政報告諮詢會
煲呔曾今日會為任內最後一份施政報告，落去尖沙咀科學館進行地區諮詢，記得今年三月喺同一地點，社民連成員狙擊煲呔曾搞到惹上官非，如今變成「驚慌鳥」嘅警方，今日又會否出動過百警力，將成個尖沙咀都變成核心保安區呢？
到科學館踩場
不過，無論點都好，社民連同人民力量已講明會狙擊到底，誓要令煲呔曾難睇。
社民連已經發起「狙擊施政報告諮詢會——立即撤回遞補機制，要求曾蔭權下台」行動，呼籲支持者今日五點半鐘齊集科學館。今年三月社民連成員送粟米斑塊飯畀煲呔曾，今日會送乜嘢呢？
社民連副主席吳文遠話暫時未諗，反正佢哋嘅行動好多時都係無乜計劃，總之大前提係要向煲呔曾問責。
至於人民力量亦醞釀衝擊行動，主席劉嘉鴻只係煩緊主打邊個議題，事關由民生問題以至警權過大，又或者係替補機制等，統統都同煲呔曾有關，但終極訴求就係要煲呔曾下台！