政情：五散人圍插煲呔曾
煲呔曾治下嘅香港民不聊生，佢十月就會推出任內最後一份施政報告，人人都叫佢唔好抱住夕陽政府心態，務必要諗掂本港嘅中長期發展。偏偏喺呢個時候，立法會「五散人」之一嘅廠商會代表林大輝就獨排眾議，叫煲呔曾唔好提出新嘅中長期計劃，仲警告唔好再講埋啲乜嘢「奮鬥到最後一秒」嘅言論。究竟大輝嘅葫蘆裏面賣緊乜嘢藥呢？
尋日輪到五散人向煲呔曾反映對施政報告嘅意見。其中大輝提交嘅建議書，一劈頭就係叫煲呔曾「妥善處理任內未完成工作，毋須提出全新的中長期計劃」，事關過去提出嘅十大基建、六大優勢產業，統統都未搞掂，與其嘥心機同時間做長遠工作，倒不如搞番掂未做好嘅嘢先啦！加上一旦煲呔曾提出嘅中長期計劃，得唔到下屆政府歡心，搞到要由頭嚟過就仲衰。
唔想留蘇州屎畀唐唐？
大輝仲寸爆話，前排煲呔曾自詡會奮鬥到最後一秒，令人覺得十分之此地無銀，反正煲呔曾都係出糧出到任期結束嗰日㗎啦，所以係咪都要做好啲工作，仲使乜專登話自己會奮鬥先？不過，大輝係政務司司長唐英年嘅「家臣」人盡皆知，佢嘅說話到底係咪幫緊唐唐？係咪唔想煲呔曾留低啲蘇州屎畀唐唐呢？佢就實牙實齒否認幫唐唐講嘢。
有散人私下明白箇中玄機，所以都唔係好認同大輝嘅睇法，但當講到煲呔曾嘅施政問題，散人嘅睇法又變番團結一致喎。好似立法會醫學界代表「怪醫」梁家騮，佢同煲呔曾反映，四幅用作醫療產業嘅土地，講咗幾年都仲未落實，連怪醫都覺得講來講去都係三幅被，問題係政府當耳邊風，佢先至無奈一講再講喎。
話時話，緊隨散人見煲呔曾嘅專業會議四位議員，都一致覺得最後一份施政報告唔係一個終結，反而係一個開始，仲係下屆政府嘅基礎。其中梁美芬更形容，最後一份施政報告好似中文字嘅最後一筆一畫，必須要有力，所以煲呔曾點都要做得好好睇睇。總結各人提出嘅意見，大家係咪覺得大輝嘅意見別樹一格呢？