中環出更：六嬸與友High Tea 六叔門外「把守」
「六叔」邵逸夫同「六嬸」方逸華出名恩愛，六嬸經常帶六叔外出逛商場同飲茶，話口未完，佢哋前晚就喺金鐘太古廣場間METropolitan Cafe歎茶輕鬆吓。卓妮見六嬸同幾個友人歎住咖啡有傾有講，但坐住輪椅嘅六叔就背住六嬸張枱坐喺門外，面向商場，全程由外傭照顧，而六嬸就不時望吓六叔嘅情況。六叔眼仔睩睩咁望住途人熙來攘往，睇落相當精神健康。
六嬸同友人除咗歎咖啡外，仲食咗一啲類似蛋糕嘅甜品。當佢哋準備離開時，卓妮就上前打聲招呼，可能太過突然，六嬸有啲錯愕，但就一直保持笑容，態度相當友善，佢話：「幾乎畀你嚇親呀！」至於見慣大場面嘅六叔就處變不驚，唔單止冇嚇親，仲用好友善嘅目光望住卓妮。
陳志雲「煲粥」心情靚
卓妮問六嬸有冇趁暑假去旅行，但佢就冇透露任何嘢，然後一行幾人離開現場。咁啱得咁蹺，卓妮同日下晝又喺中環皇后大道中遇到另一位無綫電視高層，就係業務總經理陳志雲。當時陳總正等候座駕接載，期間不斷講電話，當卓妮上前攀談時，佢就好主動話最近忙緊節目巡禮，啱啱開完會出嚟，跟住又趕下一場喎。見佢全程笑住口，似乎無被近日官司影響心情喎。
卓妮