死性不改，賊性難移，絕對係淫賤黎旗下《蘋果日報》最佳寫照。爛果報啱啱先至被中文大學怒插歪曲事實，捏造「中大迎新營玩死女生」，一轉頭又故態復萌，再次明屈長實主席李嘉誠。
係呀，再次，誠哥被屈已經唔係第一次，今次仲將我佛慈悲嘅清修寺院拖落水。爛果報話喎，將於二○一三年落成嘅大埔洞梓慈山寺，不但有一座七十六米高嘅青銅觀音像，而且將會成為李嘉誠嘅私家陵園，事關誠哥捐款十億元得到幕後操縱權。更加唔少得嘅老作情節就係，政府低價批地明益李家。
咁樣無中生有砌人生豬肉，難怪佛都有火啦。香港正覺蓮社社長覺光法師刊登聲明，譴責爛果報相關報道扭曲失實，捏造內容嚴重損害慈山寺以及李嘉誠名譽，寺方保留法律追究權利。覺光法師特別澄清，慈山寺為有意修持佛法人士提供道場，寺內並無任何私人佛堂、骨灰龕或者陵園設施。另外又指出，李嘉誠一個人出錢畀全世界禮佛，冇要求回報。
計功夫茶話齋，佛都有火之下採取法律行動追究爛果報不失為儆惡懲奸嘅好選擇。你知啦，淫賤黎唔見棺材唔流淚，如果唔係東方報業集團據理力爭舉報壹淫媒不斷侵犯版權，海關早前就唔會破天荒檢控不良傳媒，更加唔會罪名成立帶來阻嚇作用。而且咯喎，向爛果報追究法律責任肯定符合惡有惡報嘅天理循環。
爛果報因乜事幹經常惡意針對李嘉誠？主要係兩大原因，首先係爛果報銷量下降，跌紙就要不擇手段促銷，企圖利用誠哥嘅名人效應吸引眼球。其次咯喎，誠哥一向唔妥淫賤黎誨淫誨盜，旗下集團唔會幫襯壹淫媒落廣告，於是懷恨在心嘅淫賤黎就變相勒索，不斷生安白造抹黑中傷，以為咁就可以逼到人哋落廣告。
咦咦咦，咪住先，台灣嗰邊有人起訴壹淫媒喎，《自由時報》認為台灣《壹週刊》報道不實，嚴重影響企業形象，控告該刊侵害民譽權。台灣高等法院二審判決《壹週刊》敗訴，必須刊登道歉啟事。嗱，咁就啱嘞，依法治奸大快人心！
講番爛果報老屈李嘉誠，曾經有一次亂砌生豬肉係咁嘅，國家主席胡錦濤只不過接見誠哥之嘛，爛果報上綱上線話「李嘉誠惡晒」。功夫茶唔知領導人見誠哥同惡晒有乜關係，淨係知道淫賤黎肯定窮兇極惡，事關壹淫媒違反《淫褻及不雅物品管制條例》過百次，次次都被放生，罰款一萬幾千了事，你話嘞，邊有人惡得過佢吖！