手握立法會十二票嘅「工商專業聯盟」日前大鑼大鼓成立，表面就話團結商界力量更好向政府反映意見，其實暗地裏暗戰連場。據聞自由黨同經濟動力肯破鏡重圓一切都係利字當頭，但講到選舉層面依然無面畀，至少喺紡織及製衣界同飲食界，都各自企硬有意派出心儀人選搶灘，雙方嘅衝突矛盾可謂一觸即發。
首先講吓紡織及製衣界，備受自由黨力捧嘅鍾國斌（Felix）上屆以獨立身份參選都只係以幾百票之差輸畀經濟動力梁劉柔芬（Sophie），據聞Felix幾年來為業界奔走發聲都有口皆碑，加上業界早有求變嘅聲音，倘若Felix明年再度參選絕對有力同Sophie一拚高下。
至於飲食界，自由黨張宇人同香港餐飲聯業協會會長黃家和都勢均力敵，雖然前者因為發表最低工資言論受到狠批，但堅定維護業界立場獲業界讚揚，黃家和過去多年亦密密為業界奔走發聲，深信自己有一定勝算。究竟最後自由黨同經濟動力點樣講數避免擦槍走火，大家拭目以待喇！