政情：陳智思同情徐立之處境
港大百周年校慶典禮嘅保安安排搞到一鑊泡，有示威學生及校友慘被警方推倒及禁錮，校長徐立之成為眾矢之的，雖然佢事發後多次發聲明認衰，但被封為「聲明校長」，更有人叫佢落台。嶺南大學校董會主席陳智思（Bernard）就教精徐立之，佢話目前嘅社會氣氛，每逢舉辦有政要出席嘅盛大活動，就要預咗有人踩場，仲要處理得妥妥當當。
Bernard認為，本地院校會借鑑今次港大事件，當邀請政要出席活動時亦要為可能發生嘅示威做好準備，例如要顧及貴賓感受之餘，亦要畀示威者有機會表達訴求，包括要搵人接收請願信，總之要力求順得哥情又不失嫂意。不過，Bernard語帶同情話，徐立之嘅處境真係好艱難，事關有政要出席嘅活動，保安措施無可能由校方完全主導，所以事前同警方嘅協調就好重要喎。