政情：賭王拆大閘息通道風波
淺水灣道向來係好多名人富豪嘅居住地，尤其係經過賭王何鴻燊居住嘅淺水灣道一號大宅，就更覺華麗。不過，我哋尋日路過何家大宅門口嘅時候，就見大閘搭晒棚架，原來係有工人正在清拆大閘。
四太：好似縮咗入去
就現場所見，有四名工人正搭起棚架，由於黑金色大閘足有兩個人咁高，分量十足，工人需出動電鋸小心翼翼拆閘，又召來「吊雞車」將拆下嘅巨閘吊上車運走。施工期間，何家專車如常出入，未見受工程影響。
我哋尋日致電四太梁安琪，佢透露自己身在外地，唔知道有工人拆閘一事，但當她定過神來想了想，即時補充話：「係呀，好似（大閘）縮咗入去。」至於將來大閘會否向內遷移及重建，咁就不得而知喇。
何宅大閘所在路段，據稱業權由政府擁有，雖然地契註明大宅業主有權使用該段通道，但就不能加建大閘，所以今次拆閘，相信有助平息風波。