中環出更：鄭錦鐘歎北海道藍啤
暑假快將完結，保良局副主席鄭錦鐘（Eric）早前就抽時間同家人去日本玩咗幾日，雖然短短幾日旅程，但就食盡地道美食，大快朵頤。今次Eric就品嘗到精心製作嘅天婦羅、頂級特選和牛、鮮味無限嘅長腳蟹，統統都回味無窮。但要數最深刻印象嘅，反而係一樽藍色嘅啤酒。
話說Eric喺大阪一間餐廳食長腳蟹，喺酒水推介之中發現一種顏色湛藍嘅啤酒，與傳統琥珀色嘅啤酒比較真係大異其趣。如此特別嘅產品當然會激發好奇心，佢向侍應查詢卻礙於語言隔閡而不得要領，真係無可奈何。然而，酒樽上嘅品牌Okhotsk Blue名稱已經自揭身世，原來藍啤酒係產於北海道以北嘅網走（Abashiri），其面對海域為鄂霍次克海，亦係啤酒名稱嘅由來。
冰山雪水混海藻
網走係一個四季分明嘅地方，冬季之時會有冰塊喺海面漂浮。據悉釀酒廠係利用融化嘅冰山雪水，並混合一種海藻再加上啤酒製作工序，從而釀出獨一無二嘅藍啤酒，故此除咗一般啤酒都有嘅麥芽酒花味道，亦帶來一股清幽嘅感覺。當食客握住一杯藍啤酒，就有如將冰寒嘅鄂霍次克海置於掌心之中，用來送食生長於冷凍水域嘅長腳蟹，真係絕妙配搭。唔知下次Eric再訪東瀛，會否買番幾樽藍啤酒做手信呢？