不知不覺又一年，舊年八月二十三日菲律賓首都馬尼拉發生一宗刺痛全港七百萬人嘅屠殺事件。功夫茶仍然清楚記得，當日電視直播傳出一則消息，旅遊巴司機話「全部人質死亡」。即使最後證實仲有旅行團成員生還，之不過呢一個血腥悲劇已經足夠令到成個維多利亞港愁雲慘霧。
事隔一年之後，部分幸存者以及死者家屬去到傷心之地，同司法部長德利馬會面，要求菲律賓政府道歉賠償。哈，你估呢一個盛產特蠢部隊同卸責官僚嘅國家有乜嘢回應吖嗱？總統府話喎，民間團體已經「支付賠償金」啦。
嘩嘩嘩，民間團體居然可以代替國家出面向受害者賠償，功夫茶真係有生以來第一次領教。事實上，殉職領隊謝廷駿嘅哥哥謝志堅一嘢踢爆，上月的而且確接獲菲律賓民間團體籌得六十五萬元，對方講明係支援家屬，並無提及賠償，亦冇附帶條件。謝志堅質疑總統府轉移視線，而且「食民間團體夾棍」嘅做法令人氣憤。
至於嗰一個當眾發爛渣拒絕引咎辭職嘅馬尼拉市長林雯洛，根據當地傳媒報道，上星期出席公開場合之時仍然堅稱：「事情不在你控制範圍，不能避免。」林雯洛又話，最好係淡忘事件。
唉，原來一個國家之所以無法脫貧，真係有迹可尋㗎。應該救人嘅唔識救人，應該負責嘅唔去負責，事後又拒絕吸取教訓防止類似事件再次發生，反而選擇淡忘失憶做一隻縮頭烏龜，第三世界有乜可能進步吖！
最荒謬嘅就係，賓賓政權一來未道歉，二來未賠償，三來未保證旅客人身安全，佢哋居然厚臉皮到要求特區政府撤銷黑色旅遊警示喎。謝志堅講得啱呀，公義未彰顯之前，千祈唔好撤銷黑色旅警。
咦咦咦，咪住先，賓賓政權話喎，三世祖總統阿基諾本人已經多次就事件道歉，所以國家毋須再道歉。嗱，唔好怪功夫茶以貌取人，呢一個總統先生道歉道得嬉皮笑臉，五官表情一味嘴角含春，咁嘅所謂道歉，正常地球人都唔會收貨啦！
正所謂咯喎，出得嚟行，預咗要還，既然菲律賓相關人等欠下香港一筆血債，係咪應該償還得一清二楚呀？係咪應該還完債先至要求撤銷黑色旅遊警示呀？唉，去年今日馬尼拉，人面賓賓相映紅，人面不知何處去，賓賓依舊發噏風。
功夫茶奉勸保安局局長李少光，切莫傻傻更更撤銷警示，必須等到討回公道先至可以考慮。否則咯喎，麻煩局長向菲律賓申請政治庇護，事關會有好多人狙擊閣下八月十五！