政情：何喜華明笠CY高帽
疑似候選人之一嘅行政會議召集人梁振英（CY），尋日現身力撐香港社區組織協會活動（SoCO）。SoCO主任何喜華亦禮尚往來，向CY大送高帽，盛讚CY係最理想嘅特首人選，直情係撐到出晒面。
尋日CY出席SoCO嘅「童．影．想」攝影展，參觀貧窮小朋友嘅攝影作品，有小攝影師即席向CY反映，希望佢他朝做咗特首要幫助貧窮兒童，令CY大為受落。何喜華就話，呢次邀請CY，無非因為佢係行會成員，而佢近日言論亦好關心社會。至於為何冇邀請全國人大常委范徐麗泰，何喜華覺得范太唔係官員，又無正式話參選，所以冇諗過請對方喎。
何喜華仲簡評「鐵三角」，佢話CY對貧窮問題有強烈睇法，反而政務司司長唐英年就無乜提過，而范徐麗泰更加係態度輕浮，所以佢覺得CY係最理想特首人選喎。何喜華更提示CY，如果CY肯多啲就人權法治問題表態，肯定番呢方面嘅事，市民會更加歡迎佢。撐到咁，如果CY得咗，勞工及福利局局長個位豈不是非佢莫屬？