政情：前富豪御醫帶悔認錯
港大醫學院前院長林兆鑫因侵吞港大捐款及病人診金被判監，去年獲准假釋後，洗盡鉛華，尋日出席針灸研究發布會時，就開腔承認自己做錯了，林醫生還叮囑記者不要再叫他做醫生或教授，改口叫佢做「林先生」喎。
有「富豪御醫」之稱嘅林兆鑫，出獄後返璞歸真，佢以十二個字形容依家嘅生活，就係「老伴為侶、弄孫為樂、醫書為趣」，佢自爆準備出書，又做義工協助內地扶貧。
講起獄中生活，林兆鑫就多番迴避，不欲多提，但佢語帶悔意話：「以為可以快啲推動到學校，但方法錯咗！」即使面對醫委會釘牌九個月，佢亦淡然回應話：「無諗過上訴，已經過咗去！」
睇番份針灸研究，歷時八年，林兆鑫一直有參與，期間佢經歷沙士風暴，又被揭發醜聞入獄，人生可謂大起大落。不過，佢對醫學研究仍然關注，將中西醫及科學理論注入針灸研究，佢話唔理係中醫定西醫，只要醫得好人，就係好醫學喎。