政情：陳健波拒結盟免被綁
經濟動力立法會議員林健鋒（Jeffrey）牽頭成立嘅工商專業聯盟聲勢浩大，但就唔見立會五散人在內。五散人之一嘅保險界議員陳健波解釋話，唔加入無非係唔想投票時有壓力喎，講白啲即係為免被聯盟綑綁式投票啦！
健波尋日話，Jeffrey由○八年已經想拉攏佢，但佢反而同廠商會代表林大輝比較投契，於是成為五散人。不過，健波又話，Jeffrey往後不時再游說佢，只係佢有感加入聯盟，投票時難免有壓力，相對依家比較獨立，喺關鍵時刻就變得更重要，所以佢更享受呢個狀態喎。
過去一年，健波喺立會有百分百出席率，原來佢細仔一樣咁勤力。健波為咗令即將入大學嘅細仔多了解社會，特意安排細仔加入深水埗區議員鄭泳舜辦事處，做一星期義工。最終細仔落區見識到劏房及院舍等社會問題，證明呢個方法係可行嘅。