政情：黃冰芬忙政途冇拍拖
我哋過去先後介紹過多名政壇靚女，今日輪到石門興建骨灰龕場關注小組召集人黃冰芬（Iris）。Iris去年因帶領一班沙田石門邨居民反對政府喺邨附近興建骨灰龕，因而嶄露頭角，其實呢幾年佢集中精神喺石門一帶服務街坊，去年仲搬離屋企，一個人搬去大圍唐樓居住。咪以為獨居冇乜出奇，原來Iris因為媽咪反對而差啲就搬唔到出嚟。
作為八十後嘅Iris由細到大都好聽父母話，○六年大學畢業後曾經考慮投考警察或公務員，望有份穩定收入嘅職業，而佢成長中亦冇離開過父母，係乖乖女一名。不過，由於佢決定做地區服務之後工時極長，為方便工作想搬出去住，點知媽咪知道後即時擔心到喊咗出嚟，搞到Iris唔知點算好，結果糾纏咗足足一年先至搞掂，Iris亦答應咗盡量抽時間返屋企食飯。
Iris有意參選十一月區會選舉，據聞已選定沙田碧湖選區。正因為從政工作繁重，搞到佢冇時間拍拖，家人自然好着急。不過，Iris就處之泰然，認為呢啲事無得強求，緣分要來就來，強求都冇用喎！