政情：教協買「磚頭」還華叔心願
教協比起其他泛民工會，可以話係隱形富戶，淨係計旺角自置物業會址，資產都成億億聲。近日教協再次重錘出擊，一次過畀五千萬豪買新會址，作擴充之用。教協前會長司徒華生前時講過，希望教協再買新基地，準備長期抗戰，今次教協都算還華叔心願。教協會長馮偉華話，今次聽足華叔「寧買不租」嘅吩咐，費事畀業主鍊住條頸不斷加租。
咁豪氣一次過拎五千萬出嚟，教協財力不容忽視。教協本身喺山東街好望角大廈已經有兩層物業做會址，今次佢哋喺同一條街嘅中僑商業大廈買咗全層，佔地成六千二百幾呎。屈指一算，即係成八千蚊一呎，我哋上網睇過，係中僑大廈年半內成交呎價最高嘅一次，就算對比同類型商舖，都係六、七千蚊一呎，甚少衝上八千蚊界線。我哋知道今次賣樓畀教協嘅係舖王「波叔」鄧成波，聽聞波叔放貨時甚少損手。
馮偉華話，教協一直搵緊適當地方擴充會址，今次喺同一條街買到咁大單位，已經好難得。至於兩個會址日後點分工，佢話現有會址所有行政人員同辦公室，會全部搬入對面嘅新會址，新會址除咗行政用途外，亦有教師培訓等發展中心，第日教協開會商討大計時都喺呢度，變成教協新嘅心戰室。
張文：仲有錢剩繼續入貨
至於舊有嘅兩層會址，就會全部擴充為福利部，依家教協福利部已經乜都有得賣，其實係團購嘅開山祖師。副會長張文光話，總之第日擴充後，希望做到「所有教師鍾意嘅同需要嘅，都有得賣」。至於係咪買貴咗，張文話位置最緊要，兩個會址一街之隔，有咩事都可以互相照應，管理好方便。加上教協又唔係用嚟炒樓，只係自用，所以價錢唔係大問題。
雖然大拿拿畀咗五千萬出嚟，但張文話教協仲有錢剩，只要預到啱心水嘅物業，就會繼續買會址。講到好似玩大富翁咁，話買就買，教協理財確係有一手呀。