中環耳目：洪為民最愛私竇配搭菜式
香港菁英會主席洪為民（Witman）無論食到邊度，都愛第一時間喺社交網站facebook圖文並茂分享美食。朋友聚餐，佢首選老友黃傑龍（Simon）喺尖沙咀帝國中心開設嘅「御苑皇宴」，菜式任配搭，名副其實係私家廚房。
清蒸方利魚 紅酒牛面珠
Witman上任後，幾乎晚晚有飯局，有晚就宴請菁英會社會民生研究會成員，包括羅家遠、黃麗芳等人，邊食邊傾吓發展大計。Witman話，星斑吃膩了，難刺激食欲，Simon就搵嚟一條靚方利魚，以清蒸烹調法保留原汁原味，Witman好識食，專挑方利魚邊肉吃，貪佢肉質最嫩滑。
第二味餸以紅酒煮宮崎和牛面珠。首次食牛面珠，佢大讚肉質香腍軟滑，牛味濃郁，係牛中之極品。歎完牛，Witman再捧住酒杯過隔籬房，原來交通安全隊喺鄰房祝賀兩位高級長官黃錦超及蘇麗珍獲榮譽勳章，Witman身為交通安全隊副總監，當然要一晚走兩場啦！