中環出更：小飛魚鄭志剛唔玩渡海泳
闊別三十三年嘅維港渡海泳將於十月重現，活動獲得新世界集團贊助，集團主席鄭裕彤長孫鄭志剛（Adrian）尋日就代表公司出席活動發布會，佢話維港渡海泳係一項歷史悠久嘅比賽，屬於港人嘅集體回憶，又自爆喺小學嘅時候參加過學校嘅游泳比賽，仲攞咗個全校游泳比賽冠軍添，證明佢小小年紀經已練得一身水上功。
考驗體力勇氣
Adrian又話，佢依家一得閒就會去游水，但被問到會否參加今年維港渡海泳比賽時，佢就耍手擰頭話，渡海泳同喺泳池游水唔同，因為渡海泳係一個考驗體力同勇氣嘅運動，而且今次大會仲非常嚴格，要求參賽者水試合格後先可以參加比賽，所以佢今年唔會參加住喎。
新世界集團除咗支持復辦維港渡海泳外，多年來都有推廣運動員就業計劃，事關佢哋預留咗四十個職位畀啲退役運動員，喺退役後可以繼續發揮所長。