中環出更：莫樹錦玩Wii籌款預咗獻醜
打機可以做善事，絕對唔係呃細路！前日博愛醫院同人氣遊戲機品牌Wii首次合作搞咗場打機慈善爭霸戰，喺鑽石山荷里活廣場舉行，唔少城中名人亦捲起衣袖參加「名人表演賽」。型仔醫生中文大學臨床腫瘤學系教授莫樹錦（Tony）都有撐場，佢笑稱自己完全唔識打機，預咗嚟出醜，結果真係包尾收場，但做善事無所謂啦！
李妮宅男細佬成功「脫毒」
比賽開始之前，着咗件白色潮爆恤衫配襯牛仔褲嘅Tony已經到場，一貫靚仔打扮，輕鬆自在。卓妮見佢咁氣定神閒，以為佢係深藏不露嘅「機」林高手啦，點知佢自爆完全唔識打機，仲冇臨時惡補，笑稱預咗嚟出醜添！咁大犧牲，原來係撐老友博愛總理莫兆光。
博愛副主席李妮（Lily）都落場參賽，佢同細佬李毅（Joe）及另外兩位戰友齊獲企業團體獎第三名。Lily話，自己打機功力好一般，得獎全靠細佬。原來阿Joe曾經係瘋迷打機嘅宅男，專攻策略遊戲，試過為打機連續兩日唔瞓覺添！依家佢諗起嗰段追求爆機嘅日子，都覺得好荒唐，勸喻時下年輕人要享受打機嘅過程，而唔係結果，仲要珍惜身邊嘅人。
咁熱鬧嘅場合唔少得博愛主席湯修齊（Henry）一家人。Henry同囝囝Harris都落場一試身手，太太Yvonne賽前陪住狂練機，笑言睇到眼都花。Harris今年暑假玩得咁盡興，係時候練吓「收心操」，準備開學喇！
卓妮