未入正題之前，等功夫茶同大家先介紹少少調查數據。國務院僑辦同華僑大學、社會科學文獻出版社聯合發布《華僑華人研究報告》，由一九七八年至二○○九年底，內地共有一百六十多萬人留學海外，最終只有四十九萬人畢業後回國發展。即係話，超過三分之二中國留學生人才流失。報告又指出，中國富豪移民海外急增，○九年去美國投資移民嘅中國公民較○八年多一倍。美國近十年來有三十五萬名中國人入籍，當中不乏官二代。
之所以要介紹調查數據，無他嘅，想話畀大家知一個相當可悲嘅現象，內地同胞非常熱衷於鳥獸散，一有機會就提早實現「來生不做中國人」嘅畢生志願。基於呢一個現象，香港成為其中一個田雞過河嘅移民落腳點。
好嘞，假如騙徒捉摸到內地同胞嘅走鬼心態，會唔會利用移民夢大發不義之財呢？答案心照不宣啦，中國人出晒名無惡不作，五花八門嘅黑心食品都可以賣通街，呃神騙鬼更加不在話下。
功夫茶今日要講嘅正題就係，移民香港嘅官方計劃已經淪為呃錢騙局！
呢嗱嗱嗱，大家都聽過深圳有好多中介公司，聲稱可以幫內地孕婦來港產子，原來呢一類中介公司另有副業，就係聲稱可以幫國內同胞移民來港。好似其中一間移民中介公司咁吖，負責人不斷向假扮顧客放蛇嘅記者推銷，乜鬼投資移民呀，乜鬼專才移民呀，乜鬼優才移民呀，講到實牙實齒「包攞香港身份證」。
入籍香港嘅費用係幾多呢？移民夢推銷員話喎，十萬到七十萬元人民幣不等。之不過咁，香港正式嘅投資移民計劃規定，申請者最少要投資一千萬港元，而且不包括房地產項目，你話嘞，有乜可能唔係搵笨？另一間中介公司仲誇張，佢哋竟然話香港入境處會幫申請者搵工，講到言之鑿鑿。
唉，功夫茶不禁百感交集。首先當然係有感於中國政府令人欲哭無淚啦，大腳掘起嘅強國子民居然一個二個走夾唔抖，肯定係家長式管治作風出咗極大問題，淨係無日無之「被失蹤」嘅白色恐怖已經搞到百姓不想久留。
其次咯喎，香港政府必須諗辦法堵塞漏洞，萬一騙徒真係將不符合資格嘅內地同胞送到香港，入境處瘀到痹都仲係小事，人口結構亂七八糟先至大鑊。入境處最低限度應該向內地同胞宣傳正式嘅移民計劃，趕絕騙徒等於拯救自己。
總而言之，香港官僚千祈唔好變成騙徒嘅搖錢樹，名譽受損又累街坊㗎！