下屆特首人選近日依然係政圈中熱話，唔少政圈人士都想考考自己眼光。但對一班中產嚟講，原來並唔係咁諗。最近有團體做調查，問佢哋最支持邊個出任下屆特首，答案唔係咩鐵三角，乜都唔係，最多人答嘅答案反而係「唔知道」同埋「無意見」。
中產動力喺八月四至十二日訪問咗六百幾位市民，個個月入介乎三萬至十二萬，名副其實「中產」。對於想邊個做特首，原來無咩人有興趣。民望好高嘅人大常委范徐麗泰，都係得一成七嘅支持。但范太已經高過政務司司長唐英年同行會召集人梁振英，佢哋兩個支持度分別只得一成三同一成二。
咁究竟班中產有咩想法呢？原來係無想法至真，因為答「唔知道」同埋「無意見」嘅中產，就高達四成八，幾乎一半。中產動力主席馮煒光話，結果反映中產深知自己無能力左右邊個做特首，因為最終人選都係由北京決定，所以根本無興趣去估，不如去搵真銀好過。