政情：徐立之變臉差人網上喪鬧
國務院副總理李克強出席香港大學百周年慶祝活動，警方保安嚴密到要困住示威嘅學生。校長徐立之事發當日話保安安排係為咗保護學生，搞到班學生哥好火滾。徐校長可能見勢色唔對，就發聲明話警方做法不能接受。徐校長事發短短三日就轉晒軚，警察非官方網站即刻有人惡搞，話佢係變臉新傳人。
警察非官方網站鬧爆徐校長，話佢當日喺副總理面前就表現得唯唯諾諾，努力獻媚，畀學生質問保安問題時都表現得死狗一樣，但係副總理一走，就掉轉槍頭指摘警方唔啱，真係「過河拆橋，翻臉不認人」咁話。會喺呢個網站留言嘅，如果唔係現役警察，就係退休警務人員，總之就係唔妥徐立之喇。
學生又點睇呢？港大社會科學系三年級學生、港大辯論隊隊員袁浩然尋日喺一個辯論比賽後被問起此事就話︰「學校捍衞自由，點解要請啲踐踏人權嘅領導人﹖而且校長冇理由唔理警方做咩，校長要負責任！」睇嚟徐校長嘅變臉工夫，班學生哥唔多受落噃。