政情:煲呔曾夠樣衰好易畫

以一支筆走天涯、抵死啜核風格而紅爆網絡嘅政治插畫家Cuson(盧熾剛),佢筆下所有政治人物都難免被醜化,個個都被描繪成肉酸又樣衰嘅政客。有政治人物委託中間人要求美化自己,但佢特登提高價錢,對方只能知難而退。Cuson又透露畫煲呔曾嘅獨家秘方,除咗高額、大鼻、哨牙外,一定要加「U形面豬登」,要有齊晒呢啲樣衰衰特徵,煲呔曾神髓先出到嚟。

畫咗幾年政治漫畫嘅Cuson,身價不菲,普通一幅插畫坐底收四位數字,不過Cuson唔係份份job都做,超越自己底線如歌頌政治人物嘅漫畫,就一定唔畫,幾多錢都耍手擰頭,好似早排立法會議員梁美芬搵人打畀佢問價,希望佢幫自己畫幾幅靚畫。點知Cuson話自己雖然係生意人,但都要過到自己嗰關,拒絕被金錢收編。

鼠王芬想畫靚樣唔成事

「你叫我畫到梁美芬好靚,我就唔得囉」,最後佢唔好意思推job,惟有將價錢再叫高兩成,之後鼠王芬可能嫌佢貴,就再無下文。

除咗議員,連政府都睇中Cuson畫功,財爺曾俊華想喺預算案用漫畫吸引年輕人,第一個就諗到Cuson,仲曾經託中間人打聽Cuson意向,但中間人隨即叫鬍鬚曾死心,話Cuson一定唔會幫政府。「其實我都想試吓幫政府畫,最多喺入面加啲政治密碼。」

筆下畫過數百政治人物,但要數最容易畫,Cuson首推曾蔭權,「好搞笑,你將啲最醜樣嘅元素擺埋一齊,就變咗煲呔曾。」佢話煲呔曾特徵係高額、大鼻、哨牙、無框眼鏡,同左右各一大舊「U形面豬登」,所以要畫佢好簡單。不過Cuson批評,就算畫到成班政府高官幾樣衰都好,佢哋都唔會反省。「有時市民都好期待,究竟我點畫衰班高官!」畫政治漫畫唯一好處,係幫一眾小市民消吓氣、出番啖氣。

「Money18免費即秒股票報價網站」現推出8升級功能,財經資訊,實時實發!