中環出更：鬧市搞盂蘭勝會勾起潮青回憶
新一代年輕人思想洋化，令唔少中國傳統文化面臨失傳，就算被列入國家級非物質文化遺產名錄嘅潮人盂蘭勝會，喺社會上其實都日漸式微。為咗拯救呢個珍貴文化，潮州商會青年委員會教育文化組副主任胡炎松（Anven）等一班年輕人，趁尋日假期相約參觀喺銅鑼灣鬧市搭建嘅公和堂盂蘭勝會，眾人一邊參觀古色古香嘅大型醮棚，一邊聆聽引人入勝嘅典故，眾人都話獲益良多。
有戲睇有嘢食
尋日下午現身嘅潮青大約有二十人，包括主任陳光明、副主任林淑怡（Mariana）等人。現場搭起幾個古色古香嘅巨型醮棚，又請咗戲班喺台上唱潮劇，就算天氣酷熱難當，唔少市民都唔介意來燒衣祭拜。現場熱鬧嘅氣氛勾起唔少潮青嘅童年回憶，Anven話，細個嘅時候屋企住新界，每逢盂蘭節家人就會出市區買祭品或食物，非常熱鬧，跟住盂蘭勝會有戲睇又有嘢食，難怪成班小朋友好似過年嗰陣咁開心。
潮州公和堂會長鄭翔奮見到咁多年輕人入場，開心到親自出面招呼。佢話，公和堂主辦盂蘭勝會已有一百一十四年歷史，係香港歷史最悠久嘅主辦機構。不過依家面臨青黃不接，全港六十幾個主辦勝會嘅機構，最後生嘅都係「七十後」。
新一代嫌程序繁複、烏煙瘴氣而唔肯做，好似佢個囝囝就寧願去踢波都唔願接手，所以大家真係要諗吓計。唔知班潮青參觀之後，會否度橋為百年歷史嘅盂蘭勝會增添些少潮味？
卓妮