政情：項明生指網民不滿政府
九成九香港人都無份選特首，就算有心水人選都無用，為咗畀呢班無票之人發表意見，尋日Sony PlayStation同一個網站合辦咗個「網絡紅人頒獎典禮」，其中「下屆特首選舉」最受網民歡迎，結果由「長毛」梁國雄勝出。Sony Computer Entertainment HK Ltd市場部總經理項明生（James）話，結果反映網民非常不滿政府施政，先想搵長毛衝擊吓喎。
今次約有一千五百人參加網上投票，絕對有代表性。長毛攞到三成幾得票，James話同政府施政極差有關，否則市民唔會揀呢啲激進人士做特首喎。今次頒獎禮除咗網民至愛邊個做特首外，仲有一大堆網絡最紅最爆嘅人和事，例如最受歡迎網絡歌曲，就由大熱門《小明上廣州》奪得。
主唱嘅李家仁醫生話，得獎後都唔會停止創作，話口未完，下星期就有新作《小明上深圳》，勢要小明去勻全球為止。