政情：勞永樂玩轉聯校科學展
第四十四屆聯校科學展覽又開鑼，今年嘅展品已經發展到製作以「藍芽」裝置防止銀包盜竊，但大家估吓三十年前嘅展品會係點嘅呢？擔任展覽揭幕嘉賓嘅全民健康動力主席勞永樂，原來佢七一年讀中四時已參加展覽，佢話以前科技冇依家咁犀利，整個展板介紹吓就算喎。
回想當年，勞永樂就好興奮話：「當時DNA真實結構出咗冇幾耐，我就Set咗個模型出嚟參加展覽，話畀市民知。」玩過展覽，佢第二年做埋展覽籌委會委員，中六選埋做主席，學搞活動。「咪以為主席咁易做，逐個委員拉票至得，係民主選舉產生㗎！」屈指一算至今已有三十年感情，認真唔嘢小。
勞永樂又話，同佢一樣讀聖保羅書院嘅囝囝，都玩過呢個比賽，之後仲飛去英國讀電機電子工程，依家仲喺發電廠做嘢添。尋日同場嘅立法會議員陳淑莊（Tanya）對學生哥嘅高科技作品好有興趣，樣樣作品都話好得意好盞鬼，期間試玩埋電腦防冒簽系統添，佢仲自爆係美國連續劇「CSI犯罪現場」嘅粉絲，睇來佢對科技都好有興趣喎！