抵插抵插，插得好！香港中文大學怒插淫賤黎旗下《蘋果日報》捕風捉影、斷章取義、歪曲事實，絕對大快人心！
前幾日喎，爛果報頭版雞乸咁大隻字以「中大迎新營玩死女生」為題，作咗一個古仔。古仔內容大概係話，十九歲物理系女生李天蔚參加過中大迎新營之後情緒突變，鬱鬱寡歡之下跳樓自殺。爛果報一口咬定中大迎新營係女生跳樓自殺嘅導火線，講到好似人哋係兇手咁。之但係咁，古仔內容完全冇交代中大迎新營到底點樣令到李天蔚情緒突變，具體情節完全欠奉。如果咁都可以砌人生豬肉，簡單嘞，功夫茶大聲疾呼「淫賤黎玩死所有自殺者」，原因係自殺者死前睇過爛果報，呢一份無恥報章令到佢哋情緒突變。
所以咯喎，中大各新生輔導營籌備委員會發表聲明嚴正譴責，炮轟爛果報嚴重損害中大形象。中大不但向香港記者協會以及香港報業評議會投訴，而且要求爛果報道歉。仲有呀，佢哋呼籲全體中大同學、教員、校友罷看《蘋果日報》。
對於罷看呢家嘢，功夫茶舉腳贊成，事關爛果報老作新聞簡直無所不用其極，有識之士理所當然不屑一顧。淨係舉兩單例子吖，第一單係喪盡天良嘅陳健康事件，爛果報居然自編自導，送錢畀一個剛剛死咗老婆同兩個仔嘅男人北上尋歡，然後假扮追訪拍攝，咁就變咗譁眾取寵嘅獨家頭條。呢一種弄虛作假嘅冷血行為，同無良奸商炮製假劣食品冇分別！
第二單例子，爛果報大字標題「公安加裝偷聽器／中港車全竊聽」，形容為真實版《竊聽風雲》。內容係話，所有中港牌車輛都被內地公安加裝具備竊聽功能嘅「檢驗檢疫車載卡」，任何政商猛人以及名人明星隨時洩露極密私隱都懵然不知。可惜吖，梗係老作啦，專家學者徹底測試過車載卡，得出一個斬釘截鐵嘅結論：車載卡不能竊聽。
罷看爛果報就啱嘞，民眾力量杯葛無良傳媒係最好嘅懲罰。莫講話中大有必要罷看，全港讀者都應該罷看爛果報。至於讀者仲有乜嘢選擇，答案顯而易見啦，《東方日報》同《太陽報》肯定係首選。大家睇睇《太陽報》，最近嚟一個嶄新面貌大變身，猛料如雲內容充實唔在講，版面更加令人眼前一亮。最最最重要嘅係，東方報業集團唔會無中生有，壹淫媒嗰一種為求不義之財而走火入魔嘅缺德行為，冇可能出現於《東方日報》同《太陽報》！
一句到尾，《東方》《太陽》歡迎你！