政情：黃家和掃普洱抗通脹
向來推介港式奶茶不遺餘力嘅餐飲聯業協會會長黃家和（圖），同好多港人一樣，上茶樓品茗都會揀普洱茶，佢話飲普洱茶不但對身體有益，普洱茶葉亦可作為對抗通脹嘅投資工具。
黃家和早前出席雲南省一個農業推介會時話，佢自小就跟父親上茶室，並培養出飲普洱茶嘅習慣，以前亦曾經去過雲南參觀茶葉廠，所以對普洱茶都有些少心得。佢話普洱茶之所以廣受港人歡迎，係因為普洱茶性質溫和唔傷胃，仲有清熱解毒，消脂去膩嘅功效，用嚟對付較肥膩嘅點心，自然係茶客嘅最佳選擇。
正因為普洱茶有咁好嘅保健功效，自然多人購買，所以內地曾經出現過炒賣潮。一啲優質嘅陳年普洱，動輒十幾萬元一斤，甚至有啲一斤竟然過百萬元！由於有利可圖，農民又紛紛收種茶葉，結果又搞到其他農產品供應失衡，最終普洱茶葉嘅售價都不免要摸頂回落喇。
不過，黃家和話茶葉就如同紅酒，都有收藏價值，但要注意茶葉市場要睇地區性，唔似紅酒嘅市場咁廣闊，仲要買啲高質素嘅茶葉先至有投資價值喎。