政情：立會新大樓蛇王現形
添馬艦立法會新大樓連番趕工後，尋日傳媒終於有得參觀，先後到訪會議廳、宴會廳、記者室及空中花園，發現唔少設計都同依家舊大樓有好大分別，尤其提供畀議員休息同「蛇王」嘅會議廳前廳，裝咗塊落地半透明玻璃，除非日後刻意加裝窗簾，否則議員同官員密斟、議員偷懶將無所遁形。
新大樓已經將近竣工，但一入到去就好似入咗甲級寫字樓或商場咁，縱橫交錯嘅電梯隨處可見。面積最大嘅會議廳樓底極高、通道甚闊，內有一百一十四個座位，相信坐滿人會好壯觀。過去議員喺舊大樓由會議廳走入前廳只係一步之隔，將來兩個廳完全分割，而且前廳有塊半透明玻璃喺度，大家一眼就望到入去，唔知議員仲鍾唔鍾意去呢？
距離會議廳無幾遠嘅宴會廳，大到擺十幾圍酒席都冇問題，內裏仲有個設備齊全嘅廚房，真係嘆為觀止。新設嘅空中花園就位於議員會議室外面，必須有議員陪同先去得。從花園望出去，一邊就望維港、一邊就望住新總部嘅門常開，風景都唔錯，話唔定議員會走上嚟呢度蛇王，事關會議室設有咖啡閣嘛！
立法會行政管理委員會副主席劉健儀話，只要新大樓電子系統喺月底前，通過三星期嘅測試就可以如期九月進駐，最終係咪搬到，大家就拭目以待喇。